МАКЕДОНИЈА СЕ ГРАДИ -Како изгледа новиот автопат Демир Капија-Смоквица од птичја перспектива – е насловот со кој новиот министер за транспорт и врски Владо Мисајловски ја пофали изградбата на автопатот.

Тој на својот фејсбук профил постави две видеа од птичја перспектива.

Според очекувањата на надлежните новиот автопат ќе го скрати патот до крајниот југ и ќе биде вистинско уживање за возачите.

Нова патна делница по Kоридорот 10 со должина од 28 километри се гради надвор од демиркаписката клисура од десната страна на реката Вардар и поминува низ живописна природа и се одликува со благи кривини и угорнини. Особено се атрактивни шесте моста, кои ќе бидат највисоки во земјава, со кои се премостуваат Вардар и длабоките долови и двата тунела што ги пробиваат карпестите ридови. На влезот на Демиркаписката Kлисура се гради првиот мост од новиот автопат над надојдениот Вардар и завршува во тунелите кои ја сечат карпата на чиј врв се наоѓа средновековната тврдина Просек. Патот излегува од другата страна и продолжува по вториот мост, кој се издига над вливот на реката Бошавица во Вардар.

Со завршувањето на патната делница од Демир Kапија до Смоквица ќе се комплетира автопатскиот дел од стратегискиот Kоридор 10 на македонска територија. Оваа инфраструктурна артерија нашата земја ја поврзува на север со Европа и на југ со Солунското пристаниште, а дури 70 отсто од увозот и извозот се одвиваат по неа.